[親子] <大樹先生的家> 性價比不高, 一次就夠了

終於, 終於都去了大樹先生的家....聽講Book位都要Book好耐, 所以選擇了平日去...

分了幾個時段, 揀了下午3-6pm, 原以為人會比較少, 怎知....一進塲已超級多人到了...位於D2 Place 二期, 初初走錯到一期, 後來轉折才知二期在另一邊, 相信很多人也會走錯. 

比我預期中細, 本以為是很主題式的兒童遊戲室, 但我是想太多了, 一邊是餐廳, 一邊是兒童遊戲間, 除了比一般室內遊戲室大以外, 實際上沒有太特色之處. 

收費是人頭計最低消費$120, 6歲以下小孩清潔費$59. 這不是問題, 問題是食物有什麼選擇呢? 

整本Menu大約有10頁, 飲品佔了3頁, 比較能選的只有幾款漢堡, 意大利飯/意粉的配料是換湯不湯藥, 完全倒模一樣, 只是飯和意粉的分別而已, 小食算是有誠意一點, 有5-6款, 價錢一點不便宜, 一個餐已要接近二百元, 還不計飲品. 幸好, 店方無限供應飲用水. 兒童餐具和餐椅也供應充足. 

一行四大四B 點了安格斯牛肉漢堡($188), 托盤就好大個, 有一籃子沙律菜, 幾片時令水果, 3-4條薯角, 還有像縮了水的漢堡, 好體現"妹仔大過主人婆"的意義. 安格斯牛肉都算幾厚, 上面有一片芝士, 加少許醬汁, 沒其他了...為配合小朋友都可以食, 味道係好淡的, 所以整體不能叫好味, 只能叫填得飽個肚. 

另外點了幾款小食: 香脆焗豬仔脾($108), 難明點解叫"香脆" ...這個豬脾同"脆"扯不上關係, 因為唔係油炸, 亦唔係氣炸, 又無沾麵粉, 又無麵包糠, 何來會脆? 改名都與事實不乎. 不過一碟有4隻, 都算有誠意架啦. 又係比較淡口, 豬脾因部位問題, 都唔會太稔, 係要點牙力齒開, 我也有分比QB食, 當然要切到細細粒. 味道算不過不失啦. 

香脆炸雞翼($88) 又係"香脆"惹的禍, 同樣係焗雞翼, 不過賣相的確幾好...只是上枱時本來是2+2+1咁分到好開(下圖), 只是我影相時才自行擺番靚佢... (唔好意思, 我會煮亦愛出食譜, 這種賣相收這個價錢, 我有點看不過眼!!) 一碟5隻, 都幾貴...雞翼者!!! 味道呢...唔...我唔可以話唔好食, 但就離奇地有一種怪怪的羶味, 不過雞肉都幾juicy幾嫩滑既. 

全日最好食係這一藍炸薯條($58), 波浪薯條加上少許辣粉, 好香口惹味, 不過辣味未必個個小朋友適合, 我都有分少少比QB, 佢完全接受到, 依個世界將會多一個辣妹誕生了.

食完就拿拿臨好準備去玩, 因為時間實在不多...遊戲室分左4部份, 最左邊有滑梯, 一個BB韆鞦; 中間部份係煮飯仔, 好多細細件既玩具比小朋友拎黎掟; 最右手邊就係大型波波池加滑梯. 門口另一邊是一個沙池, 適合較大既小朋友玩, 所以無專登入去睇了.

  

由於現塲已經如戰塲般混亂, 我實在無興致影這亂局, 但入塲前大人細路都要先脫鞋(但要着襪), 有職員唧消毒潔手液(但就好慳, 我咁大對手得一滴, 仲要係我要求先唧比我!!! ) 

入到去, 小心看管自己小朋友當然係父母既責任, 尤其係波波池, 因有些大一點的小朋友會好Hyper黎個"大插水", 所以有一定程度危險性, 尤其帶歲半以下既小BB入去真係要好小心好小心, 唔好掛住影相就離自己個BB太遠. 

​
QB岩岩先識行, 佢初時好慢熱, 後尾就開始投入到. 乜都攪下拎下掟下咁, 我諗佢都enjoy既. 
​
佢最開心係玩波波池, 一向鐘意好多野圍住自己, 淹沒係波波池中都唔驚, 黎到依一Part, 我先覺得今次帶佢黎算值得.







最後6點準時清塲, 埋單位位二百幾, 你話好貴又唔算, 不過個人真心覺得係有少少被報道誤導左. 食物質素真係好麻麻, 不過這當然不是重點, 比小朋友玩才重要, 不清楚早上時段人會否少一點, 下午時間人太多真的好混亂, 為防意外要人叮人跟實小朋友, 現塲亦沒有主題性的佈置, 跟康文署免費的遊戲室比, 我覺得後者仲靚D仲舒服D, 唯一可取是那大型波波池!

去過一次就夠了, 我還是情願帶QB去戶外, 去郊遊, 去農莊, 或者屋企附近的play house, 一樣玩得開心又free d.

大樹先生的家

荔枝角長順街15號D2 Place二期1樓

聯絡合作和活動:
email: sherice_hy@yahoo.com.hk
Facebook: Mini Bubble Corner

❤Blogspot❤ ❤Pixnet❤ ❤The Ztyle❤ ❤She.com❤ ❤weshare❤
❤Qooza❤ ❤UBeauty❤  ❤Beauty Exchange❤ ❤博勢力❤ 
❤Esdlife❤ ❤mamibuy❤ ❤ chef-diary❤ ❤OpenRice❤