不能去街的日子，其中一個好處就係可以清理下積存左好耐，想做未做嘅事！ 除咗努力執屋外，呢排我都努力咁整理下電腦入面嘅相，今日揾返新年前同朋友仔去菜園摘菜嘅相，仲係好回味。
呢個菜園位於元朗大棠，於朗屏站外坐K66號巴士就可以到達，位置就係『朗屏士多啤梨園』隔離平時行過門口但係冇入去，今次朋友介紹下先知原來可以自摘果菜。
新年前白蘿蔔當造，QB都摘咗幾條嚟做蘿蔔糕。呢種耙齒蘿蔔同平時我哋街市買開嘅白蘿蔔有少少分別，佢嘅汁比較少，但係蘿蔔味呢係十分濃郁。
點樣去分辨條蘿蔔紮得未呢原來就係睇下佢係咪突出泥土三分一，仲有記住嗰啲蘿蔔葉千祈唔好掉，因為可以用來製成另一種食品㗎😍
菜園仲有好多種唔同嘅當造蔬菜可以採摘，當日呢我哋仲摘咗唐生菜同增城成大白菜。
紮完擺喺竹籃入面，小朋友都覺得好好玩。
呢種增城白菜有QB咁高，好大棵，我都係第一次見㗎咋。
好不容易揀咗棵最細嘅畀QB親手收割，用嚟炒肉片十分好食，一棵食足三日呀😋
呢度好有田園風味，住慣喺大城市嘅小朋友，嚟到呢度就唔簡陋或者多蚊蟲，因為喺農田係好正常嘅。當然嚟之前要預先幫小朋友噴蚊怕水同搽防曬啦。
依種係香蕉花，我哋香港人就好少食啦，但原來菲律賓姐姐係好鍾意食嘅。
令小朋友好雀躍嘅，仲有呢度養嘅幾隻小狗仔！我去嘅時候呢佢哋仲係bb嚟，最近睇番網頁已經大隻咗好多喇！
一直有養開狗狗嘅QB, 抱住狗bb竟然有啲手足無措喎，好緊張既樣子😂
除咗菜，呢度仲有香水檸檬園
呢種香水檸檬，雖然其貌不揚，但陣味就真真係好香好香，用指甲刮下檸檬皮，仲有好 醒神嘅香茅味！
用香水檸檬浸蜜糖沖水飲，好滋潤。
園主係一個好簡樸的本地農夫，言談間可見佢對自己嘅蔬果都好感情，所以黎呢度摘菜嘅朋友，記住真係要先好落手摘，要珍惜 農作物呀！
最後園主送咗一大棵馬齒莧畀我，用黎煲豬潤水，清熱明目又好飲。
仲有我頭先話唔好掉咗啲蘿蔔葉，因為可以洗乾淨，加D鹽，用來醃雪菜，簡單用來炒肉絲都好好味架！
帶小朋友自摘蔬果係好好嘅活動，不過最近疫情嚴重，大家去之前check清楚開放時間及衡量路程，同埋做足衛生措施，帶口罩，搓手液，帶多套衫比小朋友換，開心享受農耕樂趣！
🌱有機蔬菜園開放日🌱
- 2月29日(星期六)
- 3月1日 (星期日)
- 3月7日 (星期六)
- 3月14日(星期六)
時間:下午2:00-6:00
(最遲5:00入場)
地點:潘媽媽果園
地址:元朗大棠路大棠村(Google Map : 元朗大棠村)
Facebook: 潘媽媽果園
入場費:$10
有機蔬菜:$20/磅
有機菠菜、油麥菜、枸杞菜:$30/磅
🔥注意事項🔥
1.🥰建議穿著長褲和噴蚊怕水。
2.Google Map :請輸入 [元朗大棠村]，🙅♀️不要輸入"潘媽媽果園"，因為會帶左你兜路 、更會搭錯車和行錯遠路😅。
3. 請支持環保，自備環保袋。
文章內容全屬真實分享及個人意見, 只供參考之用~
聯絡合作:
email: sherice_hy@yahoo.com.hk
Facebook: Mini Bubble Corner
Facebook: Mini Bubble Corner
沒有留言:
張貼留言