親子本地遊 ~ 葡萄成熟時, 親手摘巨峰提子

唔知幾時可以再去旅行呢？好掛住去日本摘水果，真係好好玩架！唔緊要，其實香港都有得親手摘提子架。上星期湊住兩個囡，又藍天白雲，無理由係屋企吽咁浪費，唔近近地帶左佢地去摘提子。
​提子既當造期係每年5-8月，早兩年摘過一次香印提子，真係粒粒飽滿，仲食到清甜花香，真係好好味，雖然香港同日本既氣侯唔同，但品質都唔差。今次我地摘既就係巨峰，一串串提子吊係樹上真係好可愛，雖然曬到眼都睜唔開，但都忍唔住逐串睇，想揀最靚既先落手去剪。巨峰提一定要夠紫先熟透，夾雜綠色既提子係未成熟既，千祈唔好摘，因為會酸澀架！

​

​

我地千挑細選，剪左一串約2磅重$160，雖然都有點少貴，不過免入場費，當一個活動價錢又可接受既。

​

兩位小妹妹本來大叫熱，唔多願郁，對比提子，佢地更愛既係提子田內的泥氹，因為落過雨所以幫兩人換上水靴，任踩都唔怕，所以佢地好訓身咁玩泥，瞬間變左屎撈人咁，仲哈哈大笑。

​

​

除左提子，仲有西瓜同其他瓜菜可以摘，依度仲種左大片水稻，陽光打落黎閃閃生光，名付其實既「水禾田」好治癒呀！依度仲有大片草地，任小朋友或狗狗放電，平時超怕熱既QB，有朋友一齊玩，烈日當空踢波又無呻過喎！

​
​

​

​
✅郊遊必備蚊怕水、防曬霜、帽、小風扇、毛巾仔，都可帶備退熱貼貼在頸降温。
✅着長褲同帶防曬衣，避免曬傷同防蚊。小朋友玩完會出晒汗，帶多套衫換最穩陣。
✅場內有飲品售賣，附近亦有公厠，乾糧就要自備啦。
✅摘下既提子可以即埸清洗就食得，不過我鐘意雪凍先食，擺雪櫃可以Keep到差唔多成個星期都仲好靚，味道都幾香甜，口感就挺身過日本產既巨峰。

7月香印提子就會成熟，趁天氣好可以帶小朋友去玩下，人一D都唔多，影靚相無難度
​
地點: 元朗大棠朗屏士多啤梨葡萄園 

交通: 朗屏站乘K66 至大棠迴旋處行5分鐘即到

合作邀稿, 文章內容全屬真實分享及個人意見, 只供參考之用~

聯絡合作和活動:

Email: sherice_hy@yahoo.com.hk

Facebook: Mini Bubble Corner

❤Blogspot❤ ❤The Ztyle❤ ❤She.com❤ ❤wordpress❤

❤weshare❤ ❤Pixnet❤ ❤Beauty Exchange❤

❤mamibuy❤ ❤Oh!爸媽❤ ❤ 親子日常❤ ❤sundaykiss❤

❤esdlife❤ ❤chef-diary❤ ❤cook1cook❤ ❤OpenRice❤