上星期大家經歷了凍到入心的真寒流, 好耐無試過咁凍真係有D意猶未盡. 天氣回暖番都唔怕, 無寒流, 仲有韓流, 而且一興就好幾年, 連飲食都要韓先夠潮. 之前行過凍肉店, 見到一排一排既牛肋條, 好鬼吸引, 買左返屋企再諗諗煮咩好, 最後就整左個韓式辣醬炆牛肋條, 容易做, 又好鬼入味同稔, 天寒地凍, 放在石頭窩上枱, 熱辣辣食得特別窩心.
材料:
急凍牛肋條 1磅
白蘿蔔 1條
甘荀 1條
韓國梨(磨蓉) 1個
洋蔥 1/2個
薑 數片
韓式辣醬 適量
紫菜和炒香芝麻粒(裝飾用) 少許
這個菜式的竅門在於韓國梨, 因為梨的果酸能令牛肋條加快變稔, 效果跟用醋一樣, 而且增加甜味和果香. 用豐水梨, 南水梨或黃金梨也可以.
做法:
1. 牛肋條先以醬油, 糖, 紹酒, 胡椒粉和少許生粉醃好, 然後用小火煎至兩邊微黃, 盛起.
1. 牛肋條先以醬油, 糖, 紹酒, 胡椒粉和少許生粉醃好, 然後用小火煎至兩邊微黃, 盛起.
2. 另一鑊泡香薑片, 洋蔥, 下白蘿蔔和甘筍炒香, 加入韓式辣醬(辣度自行調較)炒勻, 下牛肋條回鑊. 贊少許紹酒, 加入少許醬油, 糖調味, 加入梨蓉加蓋文火炆1小時. (可炆半小時, 熄火焗15分鐘, 再炆半小時)
牛肋條炆稔和汁收至差不多乾即可轉入燒熱的石頭窩, 最後加上紫菜條和芝麻粒即成.
同樣的做法可用來炆雞翼, 牛腩, 豬手都得, 易做又很快稔, 辣辣地夠開胃, 冬天食暖身一流.
